Qateel Shifai

 Qateel Shifai Poetry in Urdu

Qateel Shifai

 

بس اک بار تری لاش اس پہ تڑپی تھی

پھر اس کے بعد زمیں کو ملا نہ چین حسین

قتیل شفائی

 

آو کوئی تفریح کا سامان کیا جائے

پھر سے کسی واعظ کو پریشان کیا جائے

قتیل شفائی

 

یہ سوچ کر کہ نہ ہو تاک میں خوشی کوئی

غموں کی اوٹ میں خود کو چھُیا لیا میں نے

قتیل شفائی

 

دنیا میں قتیل اس سا منافق نہیں کوئی

جو ظلم تو سہتا ہے بغاوت نہیں کرتا

قتیل شفائی

 

معترف میں اپنی گُستاخی کا ہوں، لیکن

حُسن والوں کو بھی تھوڑی خوش بیانی دے

قتیل شفائی

 

میں ہوں دربارِ محمدﷺ کا قصیدہ خواں قتیلؔ

اس لئے اپنے سُخن کو معتبر کہتا ہوں میں

قتیلؔ شفائی

 

سُنتے ہیں قتیلؔ،پھر سے موسیٰ

فرعون کے گھر میں پل رہا ہے

قتیل شفائی

 

میں نے دیا الزام تو چیخ اُٹھا شیطان

یار۔ یہ سارا کیا دھرا آدم کا ہے

قتیل شفائی

 

اُٹھا تھا دُھواں بس اِک مکاں سے

اب شہر کا شہر جل رہا ہے

قتیلؔ شفائی

 

کاش ہم اس سے بچھڑے ہوتے دکھ بھی ہوتا جسے قتیلؔ

ترکِ تعلق اس سے کیا ہے جس سے تعلق تھا ہی نہیں

قتیل شفائی

 

پابندیِ افکار - قتیل شفائی

پہلے تھے موضوعِ سُخن

مہکی شام، کھنکتے جام

رہ گئے باقی اب یارو

نزلہ، کھانسی اور زکام

Pabandi-e-Afkaar - Qateel Shifai

Pehlay Thay Mozou-e-Sukhan

Mehki Shaam, Khanaktay Jaam

Reh Gaye Baaqi Ab Yaaro

Nazla, Khaansi aur Zukaam

 

جو مکیں جس مکاں میں بستا ہے

اس کی چھت سے لہو برستا ہے

اب یہ عالم ہے اپنے شہروں کا

لوگ روتے ہیں ظلم ہنستا ہے

کوئی رہبر نہیں بتاتا ہمیں

کس طرف دوستی کا رستہ ہے

بولتا ہے جو امن کے حق میں

ظلم آوازیں اس پہ کستا ہے

ایک اک چیز ہوگئی مہنگی

صرف انسانوں کا خون سستا ہے

سانپ ڈستے نہیں ہیں سانپوں کو

آدمی آدمی کو ڈستا ہے

ہر شریف آدمی قتیلؔ یہاں

آبرو کے لیے ترستا ہے

قتیل شفائی

 

 

جذبات کی راہوں پہ رواں کر دیا مجھ کو

اک شخص کی باتوں نے جواں کر دیا مجھ کو

میں نے تو بہت خود کو چھپایا پسِ گفتار

اس نے مرے چہرےسے عیاں کر دیا مجھ کو

کیا اشک بہائے مری روداد پہ اُس نے

میں آگ کا شعلہ تھا دھواں کر دیا مجھ کو

دی اپنے مراسم کی کچھ ایسی مجھے پہچان

اُس شخص نے بے نام و نشاں کردیا مجھ کو

میں بولنا چاہوں بھی تو بنتے نہیں الفاظ

تقدیر نے گونگے کی زباں کر دیا مجھ کو

لرزاں تھی یہ دھرتی مرے قدموں کی دھمک سے

حالات نے بے تاب و تواں کر دیا مجھ کو

میں اپنی وفا میں ہوں قتیلؔ آج بھی قیدی

اُس زلف نے آزاد کہاں کردیا مجھ کو

قتیل شفائی

 

 

شبنم نہیں کہتا اُسے شعلہ نہیں کہتا

وہ کوئی بھی ہو میں اُسے تجھ سا نہیں کہتا

اس ڈر سے کہ تومجھ کو شفایاب نہ کردے

قاتل تجھے کہتا ہوں مسیحا نہیں کہتا

دریا تو ہے وہ جس سے کنارے چھلک اٹھیں

بہتے ہوئے پانی کو میں دریا نہیں کہتا

سجتی ہے خیالوں میں سدا کوئی رفاقت

تنہا ہوں مگر خود کو میں تنہا نہیں کہتا

گہرائی جو دی تو نے مرے زخمِ جگر میں

میں اُتنا سمندر کو بھی گہرا نہیں کہتا

کس کس کی تمنا میں کروں پیار کو تقسیم

ہر شخص کو میں جانِ تمنا نہیں کہتا

کرتا ہوں قتیل ؔاپنے گناہوں پہ بہت ناز

انسان ہوں میں خود کو فرشتہ نہیں کہتا

قتیل شفائی

 

 

تو جھینپ کے گلشن میں اگر پاؤں دھرے گا

کانٹے تو بڑی چیز ہیں پھولوں سے ڈرے گا

بندیا تو مصور نے بنا دی مرے خوں سے

تصویر میں وہ کون سا رنگ اور بھرے گا

موسم کا جسے ٹھیک سے اندازہ نہیں ہے

تپتے ہوئے صحرا میں بھی سردی سے ٹھرے گا

واعظ نے عطا کی جسے نفرت کی کمائی

اک روز محبت کے جوئے میں وہ ہرے گا

ہم پی گئے جو پیاس تھی مخلوقِ خدا کی

اب بعد ہمارے کوئی پیاسا نہ مرے گا

دنیا میں قتیلؔ آپ حسینوں سے نمٹ لے گا

اللہ تو محشر میں ہی انصاف کرے گا

قتیل شفائی

 

اے خدا اب تو اُسے جھومتا بادل کردے

یوں وہ برسے کہ مرے پیار کو جل تھل کر دے

مرے محبوب کے پیروں کو جو چھینٹا چومے

ایسے چھینٹے کو چھنکتی ہوئی پائل کردے

کیسے ممکن ہے کہ میں حشر کے سورج سے ڈروں

مجھ پہ سایا جو مرے یار کا آنچل کردے

اے مرے حسن ِخیال اس کو سجانے کیلئے

صبح کو غازہ بنا،رات کو کاجل کر دے

آج پھر جھیل کنارے مجھے تڑپاتا ہے

کاش اس چاند کو پانی میں کوئی حل کردے

اے مقدر مجھے ترسائے گا آخر کب تک؟

یا مری بات سمجھ،یا مجھے پاگل کر دے

وہ مجھے کر تو رہاہے نظر انداز، قتیلؔ

اُس کو بھی وقت زمانے سے نہ اوجھل کردے

قتیل شفائی

 

کب مرے یارب، بہ عنوان ہنر کہتا ہوں میں

نعت جب کہتا ہوں تیرے حکم پر کہتا ہوں میں

حکم تیرا ہے کروں مدحِ نبیؐ میں تیرے بعد

تو ہے سب کچھ، اور انہیں خیر البشر کہتا ہوں میں

اُنؐ کے ذکرِ خیر پر لازم ہے آنکھوں کا وضو

جو کہوں اُن کے لئے با چشمِ تر کہتا ہوں میں

رفتہ رفتہ کس طرح پہنچا میں اُنؐ کے پاؤں تک

سجدہ سجدہ اپنی رودادِ سفر کہتا ہوں میں

مانتا ہے کرکے بند آنکھیں جو احکامِ رسولؐ

صرف ایسے شخص کو اہلِ نظر کہتا ہوں میں

اے خدا یہ بھی مجھے تیرے نبیؐ کی دین ہے

بات جو کہتا ہوں بے خوف و خطر کہتا ہوں میں

میں ہوں دربارِ محمدﷺ کا قصیدہ خواں قتیلؔ

اس لئے اپنے سخن کو معتبر کہتا ہوں میں

قتیل شفائی

 

نہ کوئی خواب ہمارے ہیں نہ تعبیریں ہیں

ہم تو پانی پہ بنائی ہوئی تصویریں ہیں

کیا خبر کب کسی انسان پہ چھت آن گرے

قریۂ سنگ ہے اور کانچ کی تعمیریں ہیں

لُٹ گئے مفت میں دونوں، تری دولت مرا دل

اے سخی! تیری مری ایک سی تقدیریں ہیں

کوئی افواہ گلا کاٹ نہ ڈالے اپنا

یہ زبانیں ہیں کہ چلتی ہوئی شمشیریں ہیں

اب کے عشاق کی یہ زندہ دلی بھی دیکھو

ہجر کے دن ہیں مگر وصل کی تدبیریں ہیں

ہم جو ناخواندہ نہیں ہیں تو چلو آؤ پڑھیں

وہ جو دیوار پہ لکھی ہوئی تحریریں ہیں

ہو نہ ہو یہ کوئی سچ بولنے والا ہے قتیلؔ

جس کے ہاتھوں میں قلم پاؤں میں زنجیریں ہیں

قتیل شفائی

 

لَب سِل گئے قتیلؔ بس اِک التجا کے بعد

میں چاہتا ہوں کس کو شہہِ انبیاء کے بعد

لایا ہوں اُن کے در سے میں بھر بھر کے جھولیاں

آسؤدہ نظر ہوں میں اُن کی عطا کے بعد

قلب و نظر مرا دین تھے صحت ملی مجھے

اُس شہرِ بے مثال کی آب و ہوا کے بعد

کل کائنات کے لئے جب وہ ہوئے طلوع

سب چاند ماند پڑ گئے اُن کی ضیاء کے بعد

باقی تھا مرحلہ ابھی تکمیل دین کا

آئے حضور اس لئے سب انبیاء کے بعد

دل تو کچھ اور کہتا ہے لیکن میں کیا کروں

سجدا روا نہیں ہے کسی کو خدا کے بعد

دنیا میں احترام کے قابل ہیں کتنے لوگ

میں سب کو مانتا ہوں مگر مصطفےٰ کے بعد

Lab Sil Gaye Qateel Bas Ek ilteja K Baad

Main Chahta Houn Kis Ko Shah-e-Ambia K Baad

Laaya Houn Un K Dar Say Main Bhar Bhar K Jholian

Asooda-e-Nazar Houn Main Unki Ataa K Baad

Qalb-o-Nazar Mera Deen Thay Sehat Mili Mujhay

Us Shehr-e-Bay Misaal Ki Aab-o-Hawa K Baad

Kull Kainaat K Liye Jab Woh Huay Taloo

Sab Chaand Maand Par Gaye Unki Zia K Baad

Baaqi Tha Marhala Abhi Takmeel-e-Deen ka

Aaye Huzoor (SAW) is Liye Sab Ambia K Baad

Dil Tou Kuch Aur Kehta Hay lakin Main Kaya Karoun

Sajda Rawa Nahein Hay Kisi Ko Khuda K Baad

Dunya Main Ahtraam K Qaabil Hain Jitnay Log

Main Sab Ko Manta Houn Magar Mustafa K Baad

Qateel Shifai

 

صاف جب اُس نے کہہ دیا مجھ سے نہیں ہے پیار اُسے

جانے پھر آج بھی ہے کیوں، میرا ہی انتظار اُسے

روٹھ کے چل دیا کبھی، چھم سے کبھی وہ آگیا

کس نے وصال و ہجر کا، دے دیا اختیار اُسے

ہو نہ سکا مجھے کبھی، حوصلہ بے وفائی کا

میری بجائے کوئی اور کر گیا بے قرار اُسے

بھولے سے آگیا تھا وہ، میرے محلے ایک دن

ایک رئیس شہر نے طعنے دیے ہزار اُسے

بیت گئے کئی برس، بھید یہ مجھ پہ اب کھُلا

ترکِ وفاکے بعد بھی، میں نے کیا ہے پیار اُسے

اس کی رسیلی آنکھ تھی، جام شراب کا بدل

برسوں اب اپنے شہر میں، ڈھونڈیں گے بادہ خوار اُسے

اُس کے فراق میں قتیلؔ، تیری تو جاں چلی گئی

تجھ سا ہی اب تو کوئی اور چاہیے جاں نثار اُسے

قتیلؔ شفائی

 

 

جب بھی کوئی ادا تری بھا گئی مجھے

اپنی تباہیوں پہ ہنسی آگئی مجھے

Jab Bhi Koi Ada Teri Bhaa Gayi Mujhay

Apni Tabahiyoun Pah HAnsi Aa Gayi Mujhay

وہ آزار کہ جس کی مروت کا زعم تھا

دل سے نکل کے اور بھی تڑپا گئی مجھے

Woh Aazaar Kah Jiski Murawwat Ka Zow'am Tha

Dil Say Nikal K Aur Bhi Tarpa gayi Mujhay

ممکن ہے اس سے موت بھی گوش آشنا نہ ہو

جو بات بے رخی تری سمجھا گئی مجھے

Mumkin Hay Is Say Moat Bhi Goash Aashnaa Nah Ho

Jo Baat Bay Rukhi Teri Samjha Gayi Mujhay

اپنی نظر بھی اب مجھے پہچانتی نہیں

شاید تری نگاہِ کرم کھا گئی مجھے

Apni Nazar Bhi Ab Mujhay Pehchanti Nahin

Shayad Teri Nigah-e-Karam Kha Gayi Mujhay

Qateel Shifai

 

 

آزاد غزل

میری دنیا میں کہیں بھی چاندنی راتیں نہیں

اس لیے تم سے ملاقاتیں نہیں

دیکھنا چاہو جو ساون کا سماں تو دل میں آؤ

میری آنکھوں میں تو برساتیں نہیں

جو اُٹھانے آئے بے بس دلہنوں کی ڈولیاں

وہ تو یلغاریں ہیں باراتیں نہیں

کہہ رہے ہیں آپ اپنے اہلِ مجلس کو برا

میرِ مجلس یہ بھلی باتیں نہیں

جن میں شامل ہو خوشامد، جن کا مقصد ہو مفاد

وہ قصیدے ہیں مناجاتیں نہیں

دل کی بے تابی نے بخشی ہیں یہ سب رسوائیاں

یہ محبت کی تو سوغاتیں نہیں

اے خدا میرے وطن کے موسموں کو کیا ہوا

ابر ہیں موجود برساتیں نہیں

ذات کے خانے میں بس عاشق ہی لکھوانا قتیلؔ

اہلِ دل کی مختلف ذاتیں نہیں

قتیل شفائی - برشگال 

  

معاملہ ہمارے دل کا اُس پہ اب عیاں ہوا

بہت دنوں کے بعد کوئی ہم پہ مہرباں ہوا

جو بول اٹھی ہیں دھڑکنیں تو کس کا یہ کمال ہے

ہمیں تو عرضِ شوق کا بھی حوصلہ کہاں ہوا

کسی کے ہاتھ آ بھی جائے تو نہیں ہے ڈر کوئی

وہ ان لکھا معاہدہ جو اپنے درمیاں ہوا

دکھائی دے رہا تھا وہ جو عام سااک آدمی

وہی ہمارے دل کی سلطنت کا حکمراں ہوا

وہ اس کے ہونٹ جو مری غزل سے ہمکلام ہیں

انہی کو دیکھ دیکھ کر مرا ہنر جواں ہوا

وہ اس کا جسم، جل اٹھے نگاہ جس کی آنچ سے

اُسی کے روبرو تو میرا دل دُھواں دُھواں ہوا

جو کافر اُس کو دیکھ لے تو وہ خدا کو مان لے

طلوع اس کے حسن سے وہ صبح کا سماں ہوا

قتیلؔ اُس کی یہ ستائش اور اتنی برمحل!

قصیدہ گوئی میں ترا قلم تو اب رواں ہوا

قتیل شفائی

 

شہرِآشوب

رشتہِ دیوار و در، تیرا بھی ہے، میرا بھی ہے

مت گرا اس کو یہ گھر تیرا بھی ہے، میرا بھی ہے

تیرے میرے دم سے ہی قائم ہیں اس کی رونقیں

میرے بھائی یہ نگر تیرا بھی ہے، میرا بھی ہے

کیوں لڑیں آپس میں ہم ایک ایک سنگِ میل پر

اس میں نقصانِ سفر تیرا بھی ہے، میرا بھی ہے

شاخ شاخ اس کی ہمیشہ بازوئے شفقت بنی

سایا سایا یہ شجر تیرا بھی ہے، میرا بھی ہے

کھا گئی کل ناگہاں جن کو فسادوں کی صلیب

اُن میں اِک نورِ نظر تیرا بھی ہے، میرا بھی ہے

اپنی حالت پر نہیں تنہا کوئی بھی سوگوار

دامنِ دل تر بہ تر تیرا بھی ہے، میرا بھی ہے

کچھ تو ہم اپنے ضمیروں سے بھی کر لیں مشورہ

گرچہ رہبر معتبر تیرا بھی ہے، میرا بھی ہے

غم تو یہ ہے گر گئی دستارِ عزت بھی قتیلؔ

ورنہ اِن کاندھوں پہ سر تیرا بھی ہے، میرا بھی ہے

قتیل شفائی

 

 

ساتھ ہمارا - قتیل شفائی

اگر جنموں کا رشتہ واقعی سچ ہے تو اے جاناں

کسی اگلے جنم میں بھی ملاقات آپ سے ہوگی

ملاقات اب کے بھی اپنی ہوئی لیکن ادھوری سی

قریب آئے ہیں لیکن درمیاں ہے ایک دوری سی

جنم ایک اور لیں گی آپ یہ دوری مٹانے کو

پسند آیا نہ اپنا وہ ملن بھی گر زمانے کو

تو کیا اک بار پھر پیاسے ہی مر جائیں گے ہم دونوں

بھٹکتی آتما بن کر بکھر جائیں گے ہم دونوں

ہماری آتما سُکھ سے کہیں تو جاگتی سوتی

سُنا ہے پیار میں نروان کی منزل نہیں ہوتی

ہمیشہ ہر جنم میں، ہر گھڑی دُکھ سہنا پڑتا ہے

قریب آکر بھی اکثر فاصلوں پر رہنا پڑتا ہے

یہ سب کچھ ٹھیک ہے لیکن مرا وعدہ ہے اے جاناں

کسی اگلے جنم میں پھر ملاقات آپ سے ہوگی

مونالیزا

 

 

 

آخر وہ میرے قد کی بھی حد سے گزر گیا

کل شام میں تو اپنے ہی سائے سے ڈر گیا

مٹھی میں بند کیا ہوا بچوں کے کھیل میں

جگنو کے ساتھ اس کا اجالا بھی مر گیا

کچھ ہی برس کے بعد تو اس سے ملا تھا میں

دیکھا جو میرا عکس تو آئینہ ڈر گیا

ایسا نہیں کہ غم نے بڑھا لی ہو اپنی عمر

موسم خوشی کا وقت سے پہلے گزر گیا

لکھنا مرے مزار کے کتبے پہ یہ حروف

"مرحوم زندگی کی حراست میں مر گیا"

قتیل شفائی

 

 

رُو برو وہ ہے عبادت کر رہا ہوں

اُس کے چہرے کی تلاوت کر رہا ہوں

لو خریدو اِک نظر کے مول مجھ کو

اپنی قیمت میں رعایت کر رہاہوں

لی ہے صبر و ضبط نے مجھ سے اجازت

اپنے مہمانوں کو رُخصت کر رہاہوں

چھِن گیا مُلکِ جوانی بھی تو کیا غم؟

اب بھی یادوں پر حکومت کر رہاہوں

کوئی بھی غم اُس کو لوٹایانہیں ہے

یوں امانت میں خیانت کر رہاہوں

اُ س نے تو بس اِک ذرا سی بات چھیڑی

میں وضاحت پر وضاحت کر رہاہوں

عشق کر کے آپ بھی بن جائیں انساں

شیخ صاحب کو نصیحت کر رہا ہوں

عاشقی طوفانِ گریہ چاہتی ہے

اور میں آہوں پر قناعت کر رہا ہوں

آسماں جو شخص ہے سب کی نظر میں

اُس کو چھو لینے کی جُرات کر رہا ہوں

میں نے دیکھا ہے قتیل اُس کا سراپا

میں کہاں ذکرِ قیامت کر رہاہوں

 

 

Rou Baro Woh Hay ibaadat Kar Raha Houn

Us K Chehray Ki Tilawat Kar Raha Houn

Lo Khareedo Ek Nazar K Moal Mujh Ko

Apni Qeemat Main Riayat Kar Raha Houn

Li Hay Sabr-o-Zabt Nay Mujh Say ijazat

Apnay Mehmanoun Ko Rukhsat Kar Raha Houn

Chin Gaya Mulk-e-Jawani Bhi To kaya Gham

Ab Bhi Yadoun Par Hakoomat Kar Raha Houn

Koi Bhi Gham Usko lotaya Nahein Hay

Youn Amanat main Khayanat Kar Raha Houn

Us Nay Tou Ek Zara Si Baat Chairi

Main Wazahat par Wazahat Kar Raha Houn

Ishq Kar K Aap Bhi Ban Jayen insaan

Sheikh Sahib Ko Naseehat Kar Raha Houn

Aashqui Toofan-e-Girya Chahti Hay

Aur Main Aahoun par Qanaat Kar Raha Houn

Asmaan Jo Shakhs Hay Sab Ki Nazar Main

Usko Choo Lainay Ki Jurrat Kar Raha Houn

Main Nay Daikha Hay Qateel Uska Sarapaa

Maian Kahan Zikr-e-Qayamat Kar Raha Houn

 

 

Haalat Ke Qadmo'n Pe Qalandar Nahi Girta

Tootay Bhi Jo Taara To Zameen Par Nahi Girta

Girtay Hain Samundar Main Baray Shauq Say Darya

Lakin Kisi Darya Main Samundar Nahein Girta

Samjho Wahan Phaldaar Shajar Koi Nahi Hai

Wo Sehan Ke Jis Main Koi Patthar Nahi Girtaa

Itna To Hua Fayeda Baarish Ki Kami Se

Is Shehr Main Ab Koi Phisal Kar Nahi Girta

Mashkook Nazar Say Mujhy Tak’ti Hay Yeh Dharti

Kuin Arsh-e-Mualla Mere Sir Par Nahein Girta

Inaam Ke Laalach Main Likhay Madh'a Kisi Ki

Itna To Kabhi Koi Sukhanwar Nahi Girta

Hairaan Hay Kayi Roz Say Thehra Hua Paani

Talaab Main Ab Kuin Koi Kankar Nahein Girta

Us Banda-E-Khud'daar Pe Nabiyo'n Ka Hai Saaya

Jo Bhook Main Bhi Luqma-E-Tar Par Nahi Girta

Karna Hai Jo Sar Marka-E-Zeest To Sun Le

Be-Baazo-E-Haider, Dar-E-Khaibar Nahi Girtaa

Qayam Hai "Qateel" Ab Ye Meray Sar Ke Satoon Par

Bhunchaal Bhi Aaye To Mera Ghar Nahi Girta...!!!

Qateel Shifai

 

حالات کے قدموں پہ قلندر نہیں گرتا

ٹوٹے بھی جو تارا تو زمیں پر نہیں گرتا

گرتے ہیں سمندر میں بڑے شوق سے دریا

لیکن کسی دریا میں سمندر نہیں گرتا

سمجھو وہاں پھلدار شجر کوئی نہیں ہے

وہ صحن کہ جِس میں کوئی پتھر نہیں گرتا

اِتنا تو ہوا فائدہ بارش کی کمی کا

اِس شہر میں اب کوئی پھسل کر نہیں گرتا

مشکوک نظر سے مجھے تکتی ہے یہ دھرتی

کیوں عرشِ معلّٰی مرے سر پر نہیں گرتا

انعام کے لالچ میں لکھے مدح کسی کی

اتنا تو کبھی کوئی سخنور نہیں گرتا

حیراں ہے کئی روز سے ٹھہرا ہوا پانی

تالاب میں اب کیوں کوئی کنکر نہیں گرتا

اس بندۂ خوددار پہ نبیوں کا ہے سایا

جو بھوک میں بھی لقمۂ تر پر نہیں گرتا

کرنا ہے جو سر معرکۂ زیست تو سُن لے

بے بازوئے حیدر، درِ خیبر نہیں گرتا

قائم ہے قتیل اب یہ مرے سر کے ستوں پر

بھونچال بھی آئے تو مرا گھر نہیں گرتا

قتیل شفائی

 

کُچھ ذی ہُنر جو بے ہُنروں کی طرح جیے

اپنے ہی گھر میں در بدروں کی طرح جیے

انساں کو چاہیے کہ مسافر نواز ہو

جِتنا جیے ہرے شجروں کی طرح جیے

رکھے وہ اپنی آنکھوں پہ اپنا بریدہ سر

جو چاہتا ہو دیدہ وروں کی طرح جیے

جن کے سُروں میں کیف تھا اوروں کے واسطے

ہم اُن اُداس نغمہ گروں کی طرح جیے

جھکنا قتیل ہم کو نہ آیا تمام عمر

جب تک جیے کشیدہ سروں کی طرح جیے

 

Kuch Zii Hunar Jo Bay Hunroun Ki Tarah Jiye

Apnay Hi Ghar Main Dar Badroun Ki Tarah Jiye

Insaan ko Chahye Kah Musafir Nawaz Ho

Jitna Jiye Haray Shajroun Ki Tarah Jiye

Rakhay Woh Apni Aankhoun pah Apna Bareedah Sir

J o Chahta Ho Deedah Waroun Ki Tarah Jiye

Jin K Surroun Main Kaif Tha Auroun K Waastay

Ham Un Udaas Naghma Garoun Ki Tarah Jiye

Jhukna Qateel Ham Ko Nah Aaya Tamam Umar

Jab Tak Jiye Kasheeda Surooun Ki Tarah Jiye

 

 

نیا عہد نامہ

قسم ہے ہمیں اپنے تازہ لہو کی

قسم زندگی کی، قسم آبرو کی

گھر اپنا کسی کو جلانے نہ دیں گے

وطن پر کبھی آنچ آنے نہ دیں گے

سدا ہم رہیں گے وطن کے نگہباں

وطن اپنا کعبہ، وطن اپنا ایماں

یہ پربت، یہ جھرنے، یہ اشجار اس کے

یہ جنگل، یہ صحرا، یہ گلزار اس کے

کسی کی بھی رونق مٹانے نہ دیں گے

وطن پر کبھی آنچ آنے نہ دیں گے

اگر کوئی سوچے بہک جائیں گے ہم

گرج کر یہ بات اس کو سمجھائیں گے ہم

کوئی فرق ہم بھائیوں میں نہیں ہے

وطن ایک ہے ایک اپنی زمیں ہے

دلوں کا یہ رشتہ گھٹانے نہ دیں گے

وطن پر کبھی آنچ آنے نہ دیں گے

رہا ہے سدا تفرقہ جن کا پیشہ

ہوئے ہیں وہ قوموں میں رُسوا ہمیشہ

جو نفرت بڑھا کر وطن بیچتے ہیں

وہ اپنی ہی ماں کا کفن بیچتے ہیں

انہیں ہم یہ سودا چکانے نہ دیں گے

وطن پر کبھی آنچ آنے نہ دیں گے

  

یہ ہنستا مسکراتا دن، یہ گاتا گنگناتا دن

جسے جذبوں سے ہم آراستہ ہر سال کرتے ہیں

یہ دن وہ ہے ، نہیں رقصِ زُباں جس کےلئے کافی

ہم اپنے وجدِ جاں سے اس کا استقبال کرتے ہیں

بڑھے حد سے زیادہ جب ستم تاریک راتوں کے

ہوئے تب آخرِ شب کچھ اُجالے مہرباں ہم پر

اجالوں کے جلو میں آج کا دن اس طرح آیا

کہ جیسے تن گیا ہو روشنی کا سائباں ہم پر

سُنو! اے سر زمیں پاک کے حسّاس باشندو!

بڑی مشکل سے ہم نے روشنی کا تاج پہنا ہے

لڑے تھے ہم کبھی جن سے بحکمِ قائداعظمؒ

ہمیشہ ان اندھیروں سے ہمیں لڑتے ہی رہنا ہے

 

 

Yeh Hansta Muskurata, Yeh Gaata Gungunata Din

Jisay Jazboun Say Ham Aarasta Har Saal Karty Hain

Yeh Din Woh Hay, Nahein Raqs-e-Zuban Jis K Liye Kaafi

Ham apnay Wajd-e-Jaan Say iska istaqbal Karty Hain

Barhy Hadd Say Zayada Jab Sitam Tareek Ratoun K

Huay Tab Aakhir-e-Shab Kuch Ujalay Meharbaan Ham par

Ujaloun K Jalo Main Aaj Ka Din is tarah Aaya

Kah Jaisay Tann Gaya Hou Roshni Ka Saibaan Ham Par

Suno! Ae Sar Zameen-e-Paak K Hassas Bashindo!

Bari Mushkil Say Ham Nay Roshni Ka Taaj Pehna Hay

Laray Thay Ham Kabhi Jin Say Bahukm-e-Quid-e-Azam

Hamesha Un Andheroun Say Hamain Larty Hi Rehna Hay

QateelShifai

 

چاندی جیسا رنگ ہے تیرا سونے جیسے بال

ایک تو ہی دھنوان ہے گوری ،باقی سب کنگال

ہر آنگن میں سجے نہ تیرے اُجلے روپ کی دھوپ

چھیل چھبیلی رانی تھوڑا گھونگھٹ اور نکال

بھر بھر نظریں دیکھیں تجھ کو آتے جاتے لوگ

دیکھ تجھے بدنام نہ کر دے یہ ہرنی سی چال

کِتنی سُندر نار ہوکوئی میں آواز نہ دوں

تجھ سا جس کا نام نہیں ہے وہ جی کا جنجال

سامنے تو آئے تو دھڑکیں مل کر لاکھوں دل

اب جانا، دھرتی پر کیسے آتے ہیں بھونچال

بیچ میں رنگ محل ہے تیرا کھائی چاروں اور

ہم سے ملنے کی اب گوری تو ہی راہ نکال!

کر سکتے ہیں چاہ تیری اب سرمد یا منصور

ملے کسی کو دار یہاں اور کھنچے کسی کی کھال

جتنا تجھے دیکھوں اتنی بڑھے نظر کی پیاس

جو کچھ تیرے پاس ہے گوری نہیں کسی کے پاس

یہ زلفیں یہ ہونٹ گلابی یہ آنکھیں یہ گال

ایک تو ہی دھنوان ہے گوری باقی سب سب کنگال

جب تک سر پر آسمان ہے پیروں تلے زمین

تب تک تیری چاہت کا ہے پورا مجھے یقین

تو نے میرا ساتھ دیا تو جئے ہزاروں سال

ایک تو ہی دھنوان ہے گوری باقی سب سب کنگال

آج کی رات بھی ہے کچھ بھاری لیکن یار قتیل

تو نے ہمارا ساتھ دیا تو جئے ہزاروں سال

Chaandi jaisa Rang Hay Tera Sonay Jaisay Baal

Aik Tou’hi Dhanwaan Hay Gori Baki Sab Kangaal

Har Aangan Main Sajay Nah Tere Ujlay Roop Ki Dhoop

Chail Chabili Raani Thora Ghounghat Aur Nikal

Bhar Bhar Nazrain Daikhain Tujhko Aatay Jaatay Log

Daikh Tujhay Badnaam Nah Kar Day Yeh Hirni si Chaal

Kitni Sundar Naar Ho Koi Main Awaaz Nah Doun

Tujh Sa Jis Ka Naam Nahein Hay Woh Ji Ka Janjaal

Saamnay Tou Aaye To Dharkain Mil Kar lakhoun Dil

Ab Jaana,Dharti Par kaisay Aatay Hain Bhonchaal

Beech main Rang Mahal Hay Tera Khai Charoun Aur

Ham Say milnay Ki Ab Gori To Hi Raah Nikaal

Kar Saktay Hain Chaah Teri Ab Sarmad Ya Mansoor

Milay Kisi Ko Daar Yahan Aur Khinchay Kisi Ki Khaal

Jitna Tujhko Daikhun Utni Barhay Nazar Ki Payaas

Jo Kuch Tere Paas Hay Gori Nahein Kisi K Pas

Yeh Zulfain Yeh Hont Gulaabi Yeh Aankhain Yeh Gaal

Aik Tou Hi Dhanwaan Hay Gori Baqi Sab Kangaal

Jab Tak Sir Par Asmaan Hay Pairoun Talay Zameen

Tab Tak Teri Chahat Ka Hay Poora Mujhay Yaqeen

Tou Nay Mera Saath Dia Tou Jiye Hazaaroun Saal

Aik Tou Hi Dhanwaan Hay Gori Baqi Sab Kangaal

Aaj Ki Raat Bhi Hay Kuch Bhaari lakin Yaar Qateel

To Nay Hamara Saath Diya To Jiye Hazaroun Saal